काठमाडौँ — दसैंतिहार एवं पर्यटकीय मौसम सुरु भएसँगै नेपाल वायुसेवा निगमको काठमाडौं–ओसाका उडानमा यात्रु बढेका छन् । दसैंतिहार पर्ने असोज–कात्तिकमा दुईतर्फी टिकट बिक्री ‘फुल’ हुन थालेको निगमका जापान प्रतिनिधि सन्तोष पाण्डेले जानकारी दिए ।
२ सय ७४ सिट क्षमताको वाइडबडी विमानमा दसैंतिहार बीचमा नेपाल आउन र जापान जान टिकट खरिद गर्ने यात्रुको संख्या २ सय ३५ नाघेको छ ।
‘यो एक महिनाको अवधिको बुकिङमा प्रत्येक उडानमा कम्तीमा २ सय ३५ यात्रु नाघेको देखिन्छ,’ निगमका सहायक प्रवक्ता सुलेश मिश्रले भने, ‘ओसाकाबाट काठमाडौं फर्किने उडानमा बिजनेस श्रेणीका १८ सिट बिक्री भइसकेका छन् ।’
निगमले यात्रु संख्या बढेपछि टिकटको मूल्य पनि बढाएको छ । निगमले सुरुको एक महिना एकतर्फी भाडा ३७ हजार हाराहारी मूल्य तोकेको थियो । ‘अक्टोबरमा इकोनमी टिकट १ लाख १० हजार र बिजनेस श्रेणीको टिकटको मूल्य १ लाख २० हजार रुपैयाँसम्ममा बिक्री भएको छ,’ पाण्डेले भने ।
टिकट बिक्री बढेपछि निगमले सातामा दुइटा मात्रै गर्दै आएको उडानलाई तीन पुर्याइएको मिश्रको भनाइ छ । निगमले भदौ १३ देखि जापानको ओसाका उडान थालेको हो । पहिलो उडानकै क्रममा यात्रुको संख्या अत्यधिक न्यून भएपछि एउटा उडान कटौती गरेको थियो । तर असोज ७ देखि निगमले पुन: सातामा मंगलबार, बिहीबार र शनिबार गरी तीन दिन उडान थालेको थियो । निगमले भाइटीकाको दिन हुने उडान भने स्थगन गरेको छ ।
